Tibang Jerpan (website_PPK)

tiang-sandung2Dalam page aku deka bekunsi artikel ti digumpul ari kereban N&B ari website Pusat Perkembangan Kurikulum.  Semua pengajar ulih download tu dikena kereban nengkebang tanya Peresa Bahasa Iban. Arapka ulih nulung bala kita. TQ

————————————————————————————————

Jerpan No.1

——————————————————————————–

REGA BUAH MENGKABANG

Pasar Debak endang mayuh mensia lebuh pagi hari Minggu. Sebelah kaki lima nyau dedat laban mensia ke bebelika barang, nyau betipas bau enggau pangan diri. Kedai kupi nyau dedat alai mensia duduk becherita macham leman pekara. Bisi sekeda ke mayuh agi pangan sereta bagas agi becherita bisi ngeniga kali udah ngirup kupi. Mentuka nyau bekaragau sebelah jalai alun Lebuh mensia mayuh sekali ngua baka nya, pasar Debak nyau baka ka enda muat empat lumpung kedai laban mensia. Pemayuh mensia nurun ke pasar laban rega getah pan nyau niki nyau lima ringgit lebih sekilo laban rega minyak mata nyau niki maket dunya. Rega getah ke niki nya ditambah ga enggau buah mengkabang ke manah bendar rega, sampai dua ringgit sekilo.


Apai Dot bisi nurun ke pasar sama bebalut enggau mensia sebelah kaki lima. Kebuah iya nurun berat amat, deka meli telefon. Niat deka meli telefon ukai datai ari ati Apai Dot laban Apai Dot dipelandikka orang tegut enggau duit. Semina tiga aja tuju duit ba penemu Apai Dot, ke simpan ba bank, ke belanja anak sekula lalu ke empa. Apai Dot ke deka meli talipon laban tekuing ati ninga jaku ansak enggau mulut ituk Indai Dot. Bisi seminggu Indai Dot udah ngumbuk iya meli talipon bekau ke udah tiga kali bejual buah mengkabang salai ngagai tauke Engkam. Terubah kena rega seringgit lima, dua kali bejual kena dua ringgit sekilo. Enti dipegulaika semua rega bisi seribu dua ratus lebih. Amat tak asaika labuh ari langit duit. Laban ke udah nerima rega mengkabang salai nya, dia dih Indai Dot kempang ati ngansak Apai Dot meli telefon. Kebuah keterubah awakka bisi ke pengingatka rega buah mengkabang. Ukai nya tak tiap taun mengkabang bebuah. Kedua awakka nyamai enti deka bejaku sida Dot. Enda ibuh ngiruh diri nurun ke pasar. Tak tekan ari dalam langkau lalu ulih ‘bealau-alau’ enggau Dot ti gawa di Kuching. Tak tekan lumur lalu ulih ‘bebai-bai’ enggau Gu, menyadi Indai Dot ti gawa di Singapore. Ni enda nyamai idup dih laban rega buah mengkabang ulih bejaku ke Kuching enggau Singapore ari langkau kebun. Mansang mih dunya! ku Indai Dot. Pasal bayar bejaku ukai tak mayuh dih. Ga anang selalu ngena enti nadai kebuah ti berat.

Apai Dot bejalai nuju kedai Tukang. Cina ke nyual talipon dikanggauka Tukang laban landik miki jam enggau radio. Mata Apai Dot nyau beba meda talipon ti berintai-rintai, tak baka rintai ikan masin ke dijembui kenu ku gamal, bisi rega beratus-ratus, bisi ke rega beribu-ribu mih nya dia.

“Meli talipon. Bansa ni ka?” ku Tukang. Tukang landik bejaku Iban.

“Berapa pengabis murah?”

Tukang lalu ngambi ia ke bansa telefon ke tau dikena ngambar. “Tu tau kena ngambar.

Bansa manah empu!”

Mulut Apai Dot lalu muchung, kening lalu ngeredut.

“Berapa rega?”

“Lapan ratus,” ku saut Tukang seraya malik ngagai mua Apai Dot. Asaika deka labuh atau Apai Dot ninga rega telefon nya ngemar nya. Orang bumai baka iya enda patut ngena utai ngemar nya. Malu ngena utai mar laban penatai pemisi enda meruan tiap bulan baka orang ke makai gaji. Ila dikumbai orang deka ngemesaika diri.

“Mesai kerubung machis, rega enda anchi-anchi! Enti kena meli beras bisi tiga taun            makai!”

“Tang ulih kurang mimit.”

“Udah kurang agi mih mar. Nadai guna nya. Tiap hari meda bisi bini-anak. Nama guna            ngambar!”

“Manah bansa tu. Ulih peda gambar diri empu,” ku Tukang ga agi ituk ngumbuk.

“Hiss!” jai baru ga mua Apai Dot. “Gamal jai baka aku tu. Nama guna ngambar!”

Tukang lalu ngambika telefon bansa Nokia bechura kelabu, “dua ratus lima puluh.”
“Mar endar nya ko! Ulih kurang?” Sayau bendar ati Apai Dot ke duit. Tak sekejap mata abis nya dua ratus lima puluh. Amat mih nya rega buah mengkabang. Duit labuh ari langit. Nadai ngena puku sepuluh sen.

“Enda ulih,” ku Tukang ngilikka pala lalu ngatur gagang cheremin mata, “udah jauh kurang. Udah murah. Agi ga giga murah agi. Ukai kitai nemu gaga. Enti nuan nemu gaga, nuan jual aku dua ribu lima ratus!”

“Enti enda ulih tawar, enda ga! Ukai nya tau dempa talipon nya,” Apai Dot lalu pansut ari kedai mai ati malu bechampur ringat.

Tiga iku nembiak bebuk chat pirang ngerenjang nunda pisin orang belagu ‘ngingkak-entepa-ngingkak-entepa’ dalam tv, tama kedai lalu beratika telefon ti berintai baka ikan masin dijembui dalam jemari cheremin sereta betanya saut enggau Tukang. Siku ari sida tiga lalu meli bansa ke tau ngambar enda ditawar. Apai Dot ngilikka pala meda nembiak nya tak kempang ati masau duit dikena meli telefon ke mesai kerubung machis. Nyangka tak enda berundingka nyawa deka makai asi agi mih mensia baka nya, ku runding Apai Dot.

Apai Dot lalu tama ngagai kedai Tiau takah sepintu ari kedai Tukang. Ba kedai Tiau telefon Nokia nya tadi pan sama rega enggau ba kedai Tukang. Apai Dot minta kurang tang bini Tiau enda nyaut semina mulut digaga enchebir, kulit kening nyau ngeredut betingkat-tingkat. Pedis bendar ga minta rega kurang. Ngelama tu deka ga Cina ditawar. Enda patut ga laban rega buah mengkabang dua ringgit sekilo, rega barang di pasar enda ulih tawar!

Apai Dot bejalai-jalai-jalai niti kaki lima. Ati iya keran bendar deka meli telefon tang ngerundingka enda ulih tawar. Lalu ke berat agi ngerundingka duit dua ratus nya tak abis sekejap mata. Enti disimpan dalam bank, berapa anak ia setaun. Taun siti beranak ga. Taun siti beranak. Tau nyadi seribu. Enti beli ke beras bisi setaun sida menyanak enda mengkasak. Kepuas ke bejalai ba kaki lima lalu betemu enggau Apai Ajok. Apai Ajok benung berandau enggau Aji Ujoi, apai tuai Laut ari Kampung Ulu. Apai Ajok sama berimbai langkau enggau iya, semina beantaraka sigi bukit. Apai Dot endang nemu Apai Ajok udah meli talipon.

“Berapa nuan meli telefon suba?” pia ku tanya Apai Dot agi mansik rega.

Apai Ajok lalu ngelimpangka randau iya enggau Aji Ujoi. Iya pan lalu ngayanka telefon bansa Nokia sama enggau ke diayanka Tukang. “empat ratus!”

“Balat ngemar nya dih.”

“Mar amat mar. Tang nyamai idup laban. Nama orang deka meli ikan pegung ngagai aku, talipon orang dulu. Berapa kilo orang ngasuh. Aku lalu nganjung ngena mutasikal nya. Nyau nadai tau besai ikan. Orang nyamai, kitai nyamai! Nya ga penguntung bisi telefon!
Apai Ajok lalu rakah-rakah ketawa gaga ati ke diri ti udah nemu penyamai laban telefon. Iya lalu ngaga diri nyambut kangau telefon, “Memunyi talipon. Anjong ikan lima kilo, ku orang. Lalu anjung aku nyah. Enda bulih sekejap mata bulih duit! Maya getah enggau engkabang berega, enda tusah nyual ikan! Orang gagaka rega getah enggau engkabang. Kitai gagaka rega ikan. Nya ga pemesai kuasa talipon.”

“Dunya udah mansang. Dunya besai udah nyadi mit,” ku Aji Ujoi agi nangkir randau            seduai iya Apai Ajok tadi.

“Amat ku nuan nya Ji. Orang gawa ngena kuasa injin magang,” ku Apai Ajok

“Kitai ditu agi megai changkul.” Aji Ujoi ngilik-ngilikka pala. Udah nya iya ngatur penuduk            sungku ba pala. “Jauh mih kitai tinggal.”

Enda bemunyi Apai Dot ninga penemu Apai Ajok enggau Aji Ujoi. Ngelama tu deka bendar mulut iya ngutuk Apai Ajok ti bisi telefon ngagai dua-tiga iku sida serumah. Ngumbai Apai Ajok deka ngayanka pemisi. Deka ngelawaka diri bebinchingka telefon sebelah pasar, baka pendiau orang kaya. Ngumbai Apai Ajok masau duit. Udah buban bulu pala agi ngembuan pengerindu orang ke nembiak. Tang ke pagi nya baru iya nemu kebuah Apai Ajok meli telefon. Nama enda penyamai bejual ikan enti bisi telefon. Ngumbang ni mulaika rega telefon nya.

Apai Ajok madahka diri deka ngiga sayur ke tamu. Apai Dot lalu tama ngagai bilik Tukang baru. Talipon enda tau enda dibeli. Tang taja pia enda tau enda ditawar ga. Enti iya deka kurang seringgit dih pama. Ti dibelika ruti gula, bisi seminggu nyawa anak manis.

“Berapa talipon tadi ulih kurang, Tukang?”

“Dua ratus empat puluh lah. Udah jauh murah aku beri nuan.”

“Giga ngemimit nya kurang.”

“Nadai untung ah.”

“Dua ratus tiga puluh lah. Cinchai ah.”

“Au lah,” pia ku Tukang, nyau ulih ga kurang. Tukang lalu ngatur talipon. Seraya ngatur Tukang lalu nanya, “Nemu kena? Enti enda nemu kena aku padah nuan.”
Ninga tanya Tukang, Apai Dot ingatka anak iya Ujang ke masuk pom empat bisi di rumah laban ti peremisi ujung taun, “nemu ah.” Iya lalu nyambut kutak telefon, “enti enggai nyadi tau anjung pulai Tukang?”

“O.. Ni tau enggai nyadi. Baru pansut ari kilang.”

Pama mih dua puluh ringgit kena meli lauk! Lalu datai ga angan-angan Apai Dot deka nupi ikan baka Apai Ajok. Lama udah pegung tiga iti ngimbai langkau nadai ikan awakka mayuh agi rega utai dipegagaka.

Apai Dot pulai ke langkau nepan van tambang. Langkau Apai Dot ba tisi jalai alun ke digaga perintah ngagai menua sida iya. Sida Apai Dot menyanak diau di langkau. Semadi mih bisi pengawa baru pulai ke rumah panjai. Diau di langkau nyamai agi laban kebun lada enggau kebun getah tak ngelingi langkau. Enda muai jam kena bejalai ngagai endur gawa. Tak pansut ari langkau lalu meda pengawa. Untak enda ga beba berundingka jaku sereta ulah orang ke setak-setak. Ukai main dih pemayuh mulut enggau ulah mensia di rumah panjai.
Datai di langkau begau anak indu dua iku Apai Dot, Endu seduai Kut, laban ke udah ditusuika indai sida iya pasal ti deka meli telefon. Enti ngelama tu seduai iya nanyaka kerupuk.

“Bisi meli talipon pai!? Bisi meli talipon pai!?”

“Bisi. Kita anang bayam ukai telefon ayam tu. Enda alah tak tetekanka lumur polis,            masuk jil kitai!”

Bala anak nyau beni-ni deka bayam telefon. Ujang enda bemunyi. Indai Dot nyau terang mua gaga. “Anang megai nama enda nemu. Enggaika meletup lagi!” ku iya nagang anak ti gagit deka megai telefon. Iya lalu nerekan-nerekan benyamai batang rekung.

“Ni lumur sa Dot? Aku ngujika,” ku Apai Dot nganu Indai Dot. Keran bendar ati iya deka            ningaka jaku orang dalam telepon nya. Iya nyau enda ingatka Ujang agi.

Indai Dot pan lalu kusil-kusil begigaka alai lumur talipon sida Dot. Nyau enda teingatka agi laban kelalu gagit. Giga kia enda temu, giga kia enda ga temu. Sampai ke digiga iya ngagai gari raga sarang senduk di dapur din. Ujung-ujung baru nemu ba dalam baku pinang tulis ba keretas kelinda. Lalu ditekanka Apai Dot lumur ba telefon. Nyau getar-getar tunjuk jari iya nangika lumur abis salah tekan. Bai ati ti kesal tak enda menuku utai ngenakutka iya. Tak nangika tetekanka lumur telefon polis. Enda alah tak tangkap polis laban dituduh orang ngaga kangau bula. Bisi nangika orang bejaku dalam telefon tak ngena jaku orang putih. Nama chara nyaut? Ukai nya ulih dikeluluka jaku orang putih ti udah enda nemu. Tak kesal diri mih ati iya. Udah betul lumur ditekanka iya, ditumpilka telefon ke pending. “Alau!” Enda ga telefon nya nyaut. “Alau” Enda ga telefon nyaut. Tekan. Tekan. “Alau-alau,” enda ga telefon nyaut. Sida menyanak nyau duduk entap ngemataka Apai Dot. Indai Dot nyau rangap-rangap, mulut kulap-kulap, nerekan-nerekan dikena benyamai batang rekung. Kiraka besedia deka bejaku enggau Dot. Enda alah nyawa iya tak idul didinga Dot. “Alau-alau’ Apai Dot lalu enda ga disaut telefon.

“Kada enda salah lumur,” ku Indai Dot nguji mantaika penemu pasal telefon ti dinga–dinga iya ari mulut orang sebelah kaki lima pasar Debak din.

“Ni patut salah. Peda nuan nyah. Sama lumur tu!”

Majak ga Apai Dot nekan-nekan ke utai dia. “Alau-alau” ga ku iya. Enda ga telefon nya nyaut. Gusak-gusak dinga. Gusak-gusak dinga nyangka tak bisi gerah sekru kini. Ni nemu kada enda udah ngirup arak orang ke ngaga, ni enda abis salah pasang.

“Kada enda nadai lain?”

“Ni tau nadai lain. Peda nuan nya nyah empat iti utai nya pansut dia. Nya lah lain ia,”            nyawa Apai Dot pan nyau majak inggar.

“Kada enda nadai beteri.”

“Baru dibeli. Baru pansut ari kilang. Ni tak lalu abis beteri. Ukai nya tak beli aku meli            utai.”
Indai Dot majak nerekan-nerekan benyamai batang rekung seraya berundingka kebuah telefon nya enggai nyaut ‘jaku alau’ Apai Dot.

“Dot, ka bengal-bengal. Inggar ke agi nyawa nuan. Perak-perak ke asai jaku nuan.            Talipon nya mit, mit ga kuasa ia.”

Apai Dot enda nyaut. Majak betekan-tekan, bealau-alau. Mata Indai Dot nyau enda mengkesap beratika Apai Dot. Mulut Indai Dot enggai ngetu bejaku ngiga kebuah telefon nya tak lalu enda ulih dikena bejaku enggau Dot.

“Enda patut Dot enda nyaut. Inggar ga jaku nuan nya dinga aku. Kada enda talipon            ayam anak mit dibeli nuan nya?”

Apai Dot enda ibuhka jaku Indai Dot.

Indai Dot agi ituk, “Kada enda talipon ayam anak mit!?”

Tak lalu ringat Apai Dot. Lalu angkat gelegensai. Mua nyau ngerecham ringat. Enda berasai jari iya lalu mandam geladak.

“Kumbai nuan beli aku! Ni talipon ayam bisi rega dua ratus lebih. Anang mapap!” ku jaku perak Apai Dot ngeransi ninga jaku Indai Dot. Apai Dot enda nangi merakka nyawa laban ukai bisi orang sepiak-sepiak ninga dih.

Tekenyit Indai Dot ninga perak Apai Dot. Tak kumbai iya nyawa Dot pansut ari telefon merak sida menyanak. Iya murus-murus dada. Udah nyamai asai seput baru iya bejaku.

“Pia. Ni dih aku nemu. Ukai nya bisi sekula dih aku.”

“Nyah! Enti nuan bengat nemu. Nyah! Ujika. Nadai nuan tak nemu ari aku dah!” Telepon lalu disurungka ngagai Indai Dot. Indai Dot enda nyambut laban takutka telefon nya tak meletup. Enda alah tak meletup enggau langkau-langkau. Tak abis sida menyanak nadai temu rampang agi.

“Nya. Enti enda nemu anang mayuh jaku. Kumbai nuan nyamai berundingka utai tu. Deka belah kerubung untak aku tu!”
Apai Dot begaru pala.

“Nama enda belajar di pasar tadi. Tak meli-meli utai sengapa,” ku Indai Dot ga ngutuk.
Apai Dot enda bemunyi laban endang salah iya tang enggai ngaku penyalah diri. Iya malu madahka diri enda nemu ngagai Tukang tadi. Nya baru Apai Dot ingatka Ujang. Nya alai iya ke enda minta ajar Tukang. Enti iya enda nemu bisi Ujang ga nemu madah. Enda patut Ujang enda nemu ngena telefon udah pom empat sekula. Taun siti ila masuk pom lima. Nya alai ke balat ngenyadika belanja awakka bisi dikena Ujang ngagai sekula tinggi.

“Alau Jang. Ngujika nuan. Nguji ngena pelajar pom empat nuan nya.”

“Uji ti tadi nuan ngasuh iya. Nuan tak ngenemuka diri. Nya alai kitai ke nyengulaka iya.            Awakka bisi nulung kitai.”

Mua Indai Dot pan lalu terang. Iya pan berengkah ga nerekan-nerekan benyamai batang  rekung.

Ujang pan lalu ngansak semak agi. Takut-takut gamal iya. Tekan-tekan. Dinga-dinga nadai ga bemunyi. Diambi iya keretas dalam kutak. Dibacha-bacha ke tulis jaku Melayu tang ke dalam telefon jaku orang putih. Dibacha dalam orang putih tak nadai tentu beseling. Tak mayuh leka jaku nyelai. Udah nya tekan-tekan sengapa enggai ga nyadi.

“Enda aku nemu,” ku Ujang seraya ngaru pala. “Nuan enda nanya ngagai Tukang tadi.            Tak meli utai sengapa,”
Apin tentu abis leka jaku Ujang udah disaut Apai iya, ”lebu ngapa sekula. Masau duit aku aja! Ngena talipon ke lungau enda ga nemu!”

Ninga jaku Apai iya, ringat ga Ujang dipadahka lebu ngapa sekula. Ujang enggai dianu            apai iya sengapa. “Ukai kami bisi belajarka talipon dih. Nuan ke tak meli utai sengapa!”

“Jaku nama dalam keretas nya ku nuan,” ku Apai Dot merening mua Ujang lalu ngerampas keretas ari jari Ujang. Melut leka maya iIya beratika tulis dia. Laban ke ampit mimit enggau orang besekula menya bisi ga seling mimit-mimit. “Jaku orang putih. Nuan ke enda nemu utai ku orang dia. Giga pom empat lalu enda nemu jaku orang putih. Enti aku sekula sampai pom empat baka nuan pejamka mata nemu mih aku macha!”

“Iya ke enda nanyaka chara ngena. Kitai dianu!” ku Ujang ga. Ujang lalu pansut ari  langkau nyau enda tan betalat ngelaban apai iya.

“Enti kita enda nemu ngena awakka aku nikauka tu. Lebu ngapa nganjung kita sekula. Pama duit simpan alam bank! Ribu udah anak ia,” Pengingar nyawa nyau munyika nyilup remang. Enti nitihka pengeringat ati iya endang deka ditikau ke iya ari mua jenila. Nadai guna-guna meli tak semina ngasuh belaya. Tang berundingka pemayuh duit dikena meli, enda ga iya nyadi. Amat mih duit nya bakaka labuh ari langit.

“Ukai nya tak belajarka talipon orang ke sekula dih,” ku Indai Dot ngarika Ujang.

“Nya! Nya alai aku ke enggai meli ngelama tu. Umbuk nuan ga nyah! Nyau baka nembiak mit nuan ngumbuk aku.”

Tengah hari nya nyau charut sida menyanak. Talipon agi garing-garing ba tikai. Indai Dot selalu nangika nya meletup laban utai dia ditekan sebarang-sebarang. Makai pan nyau enda bereta baka selama. Endu seduai Kut bemain di tanah laban nemu nyawa Apai sida iya tau meletup sebarang maya. Ujang lesap sebelah kebun lada, sebelah madang getah.

Apai Dot lalu enda makai, iya nyau garing-garing gali ngerundingka duit dua ratus tiga puluh nya tak abis sekejap mata, telefon lalu enda ulih kena. Deka nurun ke pasar nanya ngagai Tukang malu ga laban udah madahka diri nemu. Enda alah tak rakah-rakah Tukang ketawaka pemeli iya. Selemai-lemai nya iya gali. Ati pan majak ga chelap-sechelap. Ukai nya lama Apai Dot ringat ngagai bini-anak. Ringat pagi lemai abis, ringat lemai malam abis. Angkat iya lalu mai sida menyanak bejalai ngagai Apai Ajok. Ujang, Endu, enggau Kut agi nangi-nangika Apai tang laban Apai sida udah mai bejalai nitih ga sida.

Sida menyanak bejalai betunda udi niti jalai alun. Datai ba rumah Apai Ajok, Apai Dot lalu nusui telefon ti enggai nyadi-nyadi. Indai Dot nusui sida menyanak ke nyau abis belaya. Apai Ajok ke duduk besila nunga sida menyanak lalu rakah-rakah ketawa. Nyau burak ngeli batu iya ayan. Iya lalu minta telefon ari Apai Dot.

“Mudah. Endang gaya agi baru ia. Aku suba baka nya mih. Nyau kepuas nemu ga aku. Tekan tu. Udah nya, tekan tu. Dinga ka,” ku Apai Ajok.

“Uji talipon ngagai sida Dot,” ku Apai Dot seraya nyurungka lumur ba keretas kelinda.
Apai Dot nyau enda mengkesap mata beratika jari Apai Ajok nekanka telefon baka kuku gerama bejalai nengah rau. Tak nyau nadai salah tekan.

“Nya saut,” ku Apai Ajok lalu nyurungka telefon nya ngagai Apai Dot.

“Alau! Nama berita kita? Nuan tu Dot?”“Aku tu.. Au wah! Ari Sungai Tapang…. Beli aku tadi.” Inggar bendar nyawa Apai Dot nyau merak-merak munyi laban enggaika nyawa enda tampak didinga Dot. Indai Dot seruran nerekan-nerekan benyamai batang rekung enggaika jaku diri idul lebuh bejaku enggau Dot. Udah nya Apai Dot lalu nyuaka talipon ngagai Indai Dot laban Indai orang ke seruran deka nemu berita sida Dot.

“Nyah! Bejaku dia.”
Indai Dot enda berani nyambut telefon. Iya nyau getar-getar laban nangika telefon nya tak meletup. Enda alah tak tinggal rampang sida menyanak. Iya majak nerekan-nerekan.

“Ila pan. Enda tentu nyamai batang rekung tu.”

“Jampat ka! Kumbai nuan enda makai duit talipon tu!”

“Ila pan. Nuan udah bejaku enggau iya. Ni alah tak bejaku magang kitai.”
Meda Indai Dot enggai bejaku, Apai Dot lalu nyurung telefon ngagai Ujang. Ujang lalu bejaku enggau Dot. Udah nya disurungka iya ngagai Endu. Udah Endu, Kut ga agi bejaku. Udah nya Apai Dot lalu ngasuh Apai Ajok madamka telefon. Ninga Apai Dot ngasuh Apai Ajok madamka telefon, Indai Dot lalu ringat.

“Ni tak kita aja bejaku. Aku pan ka mih!”

“Nya! Tadi orang ngasuh nuan. Ila-ila ku nuan. Nadai talipon nya tau meletup!”
Udah nya Apai Dot lalu nyurungka telefon ngagai Indai Dot. Bejaku mih Indai Dot dia, nyau munyi orang ke sepuluh taun udah enda betemu. Sempat ga iya nanyaka kemaya sida Dot pulai begawai Dayak. Nyau ulih Apai Dot nganu baru iya ngetu bejaku.

“Mansang mih dunya! Ari menua ulu tau tak ulih berandau enggau orang di Kuching din nyah,” ku Apai Dot ngilik-ngilikka pala. Ati iya lantang bendar. Ngelama tu iya tak semina meda orang tang enda terundingka pemesai kuasa telefon.

“Peda nuan kitai di menua ulu tu. Jalai alun bisi. Karan bisi. Ai paip bisi. Talipon bisi,” ku Apai Ajok seraya nekuka tunjuk dikena ngira pemansang ke udah bisi ba menua sida iya. Udah nekuka empat iti tunjuk, “Tang kitai mesti pintar ngena pemansang nya ngemajuka pengawa kitai.”

Apai Dot agi itukka kuasa talipon “Ulih kena bejaku ngagai Merikan kini, ngagai Ai Ngelan kini?”

“Ni tau enda ulih. Asal ga ia bisi duit. Asal nemu jaku orang putih. Sema jaku, tak serata dunya tu mensia ulih enggau kitai bejaku,” ku saut Apai Ajok.

“Nunda ku Aji Ujoi, mit mih dunya. Pandai mih untak orang tasik. Kitai ngena dih enda nemu. Anangka ngaga! Bisi sekeda nyau enda berani megai enggaika meletup. Ukai nya bom. Ni tau meletup ngapa. Jauh mih untak kitai tinggal!”

Apai Dot, Apai Ajok enggau Indai Ajok rakah-rakah ketawa. Indai Dot nyau bilut mua laban penakut iya dibangkit Apai Dot. Taja pia ati iya din puas bendar laban telefon nya udah ngingatka rega mengkabang. Telefon nya mega udah ngemantupka ati iya ti deka bejaku enggau Dot.

“Nya lah kitai mesti pintar ngena pemansang.”

“Uji ti meli ke tau kena ngambar nih. Nya baru rindu agi ngena. Kena begambarka bala empangau ke ngerusak bunga lada.”

“Kena ngambar orang ke bendar ringat. Tadi deka ditikauka, diatu deka meli baru,” ku Ujang nyaut agi ngambi ati ngagai jaku apai iya ti madah lebu nganjung iya besekula.
Apai Dot ingatka jaku Tukang ti ngasuh iya ringat pagi tadi, “Enti nuan nemu gaga, nuan jual aku dua ribu lima ratus!” Apai Dot lalu ketawa malik ngagai Ujang. “Hahaaa! Anang munyi nya Jang. Besekula bendar Jang awakka ulih nengkebang utai baka enggi orang tasik!”
Lebuh ke benung berandau ngenang kuasa telefon. Angkat dih bemunyi telefon Apai Ajok. Telefon lalu dipendingka. Sida ke Apai Dot menyanak sama enda mengkeretik enggaika ngachau Apai Ajok bejaku.

“Au! Au! Pagi ila. Pagi la!” ku Apai Ajok. Udah nya Apai Ajok lalu nutup talipon.

“Sapa nya?” ku tanya Indai Ajok.

“Cina Sarikei. Ngasuh aku ngambi injin kena ngaga umpan ikan.”

“Ni gamal utai nya. Berapa rega?” ku tanya Apai Dot.

“Tiga ribu.”

“Apu! Balat endar rega injin nya nih. Enti disimpan dalam Saham (ASB) balat pemayuh anak nya.”

“Karan kitai udah bisi. Nyamai ngaga umpan kediri ngena injin. Ulih ngurangka ungkus meli umpan. Ulih ga untung mayuh agi. Udah kitai bulih untung baru nyimpan dalam saham.”
Nyau ngenung ga Apai Dot nemu Apai Ajok ngemeraninya meli utai. Enda tentu arap asai ati berundingka Apai Ajok tau bulih untung laban injin ti ngemar nya rega. Enti nadai untung ni enda tak muai duit ngapa, ni enda bakaka dibuai ke ai duit, ku ati iya din tang enda dipansutka laban enggai jai mulut mantah runding orang.

“Balat jamah kita. Ni enda jampat kaya!” pia ku Apai Dot setengah-setengah bungah.

“Kitai gawa enda ulih kelalu ngarapka kuasa tulang. Tusah kitai nemu penyamai. Gawa pedis utai ulih semina chukup empa. Umur majak tuai, tulang majak lembut. Kitai patut nunda orang ke udah mansang. Gawa ngena kuasa karan. Ngena kuasa injin. Ngena kuasa pemansang. Nunda ku jaku orang, kuasa endakenalugi.”

“Ukai endakenalugi!” ku Ujang nimbal, “Technology! Technology!”

“Endakenalugi!”

“Technology!”

“Barang munyi ia mih Jang. Asal ga kitai meretika utai nya,” ku Apai Ajok ketawa rakah-rakah. Udah ngirup kupi dia Apai Dot madahka sida menyanak deka angkat. Sebedau mupuk, iya ngasuh Apai madahka baru chara ngena talipon lalu mai sida menyanak sama ngingatka. Udah nya sida menyanak pan lalu mupuk. Nyau rami sida ba rantu jalai ketawaka apai sida ti deka nikauka talipon tengahari tadi. Ba ati dalam Apai Dot din, iya deka muka diri ngagai Endakenalugi nitihka penemu Apai Ajok. Lalu ke berat agi ngarapka Ujang bisi untak baka pemandai untak orang ti ngaga talipon ti benung digenggam iya nya. Tak asaika udah digenggam pemansang idup sida menyanak. Nyau enda berasai iya nguji nyebut leka jaku

“Technology.”

“Endakenalugi!”

“Technology.”

“Endakenalugi!”

Ujang ingatka penerang ari pengajar di sekula din pasal pemesai guna teknologi dalam pemansang pengidup mensia. Iya ngasaika bisi pengamat dalam leka jaku ti disebut apai iya nya.

“Amat ga nya pai! Enda ngena rugi!”

Ngabong Katoi.
20 June 2007

——————————————————————————

Jerpan No.2

————————————————————————————————

“Aku endang seruran ingat malam nya malam hari Enam, keterubah tua betemu, ati aku berasai bendar gaga laban nuan orang ti keterubah bekelala enggau aku. Maya nya tua betemu ba pengerami betunang pangan aku ke benama Lina Lee enggau petunggal nuan. Pengerami nya mih ti meri peluang ngujungka tua ulih bekelala enggau pangan diri. Tua betukar lumur talipaun binching. Lebuh nuan ti nanyaka nama aku, malu-malu aku madahka nama diri Rennee. Kangau aja Reen pia ku aku. Nuan pan madahka nama diri Abel. Laban ti agi biak sigi meruan aku kenang pengingat tua ti besulu suba. Laban bai ati ti sama bela keran ke pangan diri asaika dunya tu semina tua aja ti empu.

Tang enda disangka pengerindu tua diketuka enda lama ketegal aku anak orang ti kurang reta tengkira sereta enda tebilang. Meruan aku ingatka jaku bala kaban belayan nuan lebih agi ari bala petunggal sepiak indai nuan madahka tua enda patut begulai sejalai laban aku indu ti enda tentu menuku. Tua disemaka sida baka pipit enggau kenyalang. Naka mih pemalu asai ati aku ditempayaka orang baka nya nyentukka sida sanggup begigaka beliau ti bisi penemu menchi orang, ambika nuan enda ingatka aku agi. Nama penyalah aku? Tang maya nya nuan sigi enda bedulika jaku tagang apai indai nuan. Nuan sanggup ninggalka rumah ari ti beserara enggau aku. Ku nuan biar mati ditanggam sulu lalu sanggup nujah api penguji enggau aku. Tang taja pia, laban ke ngasika jaku apai indai, tua enda betemu agi. Ati ke lelengau ditatka pia aja. Tang nuan sigi seruran di ati belama…”

Enda berasai pengingat lama ngundang baru. Setengah taun udah nya, asaika diambi mimpi. Maya nya lemai hari minggu, aku meda iya datai ngagai rumah kami. Enda disangka iya datai laban nadai madah dulu ke penatai diri. Aku nyangka apai ti ngasuh iya datai laban aku agi ingat bisi meri lumur talipaun iya ngagai apai. Tekenyit aku meda iya datai. Kiruh indai nyendia ai sirap rian belanda. Dinahka iya kachang guring chukup pemanah, chukup pemansau enda retung. Aku ngambi sebutul ai mineral chelap, changkir dua iti laban nemu iya enda ulih tinggal air irup.

“Duduk ke atas tu Jang. Nya mih bedau lama udah datai ari kebun kami dua indai iya tadi. Ambika nuan nemu nama kebuah aku ti mai nuan betunga mua baka tu, perundingka manah tanya aku tu. Ngelama tu aku meda seduai Endu Reen nyau baka belangkas. Aku deka nanya kati baka runding nuan pasal kaul seduai tu?” ku apai sambil ngelangak ai sirap rian belanda. Jelan pemanis gaga indai. Abel nyintak seput panjai sebedau nimbal apai. Bepeluh mimit kening iya taja hari enda ga kelalu angat .Aku duduk nyendi indai enda bemunyi. Indai pan nadai mansutka jaku. Tambah mega iya endang orang ke enda tentu pejaku. Sebedau betemu enggau apai, iya diambi orang ngajar ba sekula besai tuai. Ketawa aku ninga mayuh cherita iya maya ke gawa menya. Sekeda enda nemu megai pinsil. Bisi mega tunsang pegai. Pengawa nyadi pengajar kelas malam nya semina tiga taun aja. Semadi enggau kami sebilik indai bisi didinga bejaku tang enti temuai datai jarang bendar ninga nyawa iya. Apai kami ti pejaku agi engka laban pengawa iya ke nyadi pengajar. Diatu taja pan udah pinsin gawa nyau deka lima taun udah, apai agi regas amat. Iya pinsin lima puluh lima taun. Dikena iya ngambiska hari, pengawa iya ngemansangka tanah tiga ekar dibeli iya suba ari pengajar Dominic. Apai endang bisi ngembuan pengerindu ba pengawa betanam ari menya. Diatu enti musin buah nadai meli ari pasar. Buah mutan, buah empelam nadai ulih empa kami sebilik rindu meda bala anak petunggal bejulukka buah enti maya musin. Dominic tu bansa Bidayuh ari jalai Puncak Borneo. Iya bakih amat enggau apai. Enti orang bukai pelaba aku enggai iya nyual tanah nya.

Nyau kelama baru Abel nimbal jaku apai. Abel duduk betunga mua enggau apai. Keketap ati aku . Kati enda ku saut iya lagi. Baka orang ke benung interview ulah seduai, ketawa mimit ga ati aku . Perening aku mua iya. Sekali tu tak baka orang ke macha bup aku meratika gamal iya. Sekumbang begulai enggau aku, enda kala iya ngena jaku bebunga. Nama nya ku ati, endang terus nya mih disebut iya.

“Aya, ibu aku meri terima kasih laban ulih betemu mua enggau seduai. Nyadi pasal kami duai Reen endang lama udah bepangan . Patut seduai ibu irau pasal kami duai. Aku sayau amat ke Reen tang maya ke diatu bedau bisi berundingka maya ti patut kami duai ngikat tali semaya. Aku diatu ibu ,aya benung negapka pengawa bisnes ke baru ditumbuhka pun taun tu, tang taja pia aku besemaya enda beduan iya,” ku Abel.


Ninga jaku Abel munyi nya, tak enda berasai aku angkat ari penuduk aku lalu nyilakka daun pintu bilik peninduk. Tup ! Semetup pintu ditambit baru. Diempaska anak tubuh diri atas katil. Ai mata pansut. Duduk . Mutap kediri. Ba peragam ati aku, Abel enda bebendar naburka leka bungai semaya iya ba laman ati aku. Enda berasai aku kekisi nyabak sedan-sedan. Benung sempuling runding aku tusut, aku ngasaika tandan bau aku dipegai jari orang. Berumban aku malik ke belakang. Entah kemaya Abel datai ngimbai bediri tegir-tegir ba tisi aku.

“ Lapa dek Reen. Did I say anything wrong?”

“Anything wrong ku nuan! Ngaga diri enda nemu nuan, nih! Nama jaku dek lain amat ba mua apai. Aku meda enda lantang amai gamal indai ninga jaku nuan nya. Nama dek enda sayau ke aku?” Tajam perening aku ngagai mua iya. Tachar perening mata iya berasai angat sangkai ba mua ba mua aku. Lama kami duai besabung perening. Abel duduk ngimbai aku lalu megai jari aku.
“Reen…! Sekumbang tua ti bela muai hari muar madu pengerindu, nadai kala arus pengerindu aku jauh tepejuh ke bukai. Ngelama tu nuan aja mih intan sereta emas dalam pengidup aku. Nuan mih senawah bulan ti seruran nampakka ruang ati aku. Nuan mih pemantup runding enggau penyayau aku. Nadai ati aku ngayahka nuan, Reen!”
“Eeeee…., gidan aku meda nuan tu! Ngesalka ati aku nuan.” Aku angkat ngenyit lalu tuchum lelegup meratika mua Abel. Enda berasai ai mata aku labuh laban kelalu gaga. Tempap aku iya lalu beberap mih kami duai lalu besemaya enda ngayahka pangan diri. “Asaika bemimpi ga aku ninga sada leka semaya nuan nya, Bel. Badas mih nya. Aku arapka pengerindu tua ila enda puntan baka menasan jalai jelu, enda labah baka buah merunjau ulu.”
“Sama besampi ngagai Petara mih tua, Reen. Minta Iya ngemataka pejalai perau pengerindu tua. Anang nangi tua nengah umbak tasik api penguji.”

Udah ninga pengeran ati Abel, aku enda irau agi, taja aku nemu apai indai enggau kaban belayan iya enda setuju enggau penemu ti mutus ati deka ngambi aku nyadi bini. Ketungkah ti deka mupuk, apai bisi nibarka jaku lalau.

“Jang diatu udah mih aku nemu runding nuan. Tang anang kelalu laun ga nuan meri jaku pemutus. Laban kaban belayan kitai sama bela mayuh. Enda manah ga dipeda orang bukai seduai begulai kiba kanan tang nadai tali pengikat. Aku arapka nuan ulih madah ngagai apai indai nuan lalu nanyaka runding ari seduai iya,” ku apai sambil ngiring Jang ngagai pintu pagar rumah kami laban kerita Abel ke parking ba luar. Ujan memesi ba luar lalu lemai pan berengkah besabung petang besiring kuning.

Tiga bulan udah nya kami duai netapka hari maya kami duai deka nirika ruang bilik idup selawang ba ujung taun nyerumba hari krismas. Naka mih pengaga ati aku laban nadai utai ti dikenangi agi.

Kami duai ditikah ba gerija. Lemai nya pengerami melah pinang kami duai diintu ba rumah kami aja. Agi ingat bendar ke jaku apai sebedau iya ngaga kad kangau tikah suba.

“ Kitai mayuh kaban. Enti ba hotel nyangka mayuh bala kitai ari menua enda datai.”

Lebuh maya pengerami nikah Ben menyadi tuai kami suba mayuh mija puang. Nya ti ngasuh apai jera. Nyau hari ke pengabis nya baru madah enda ulih datai madah benung kiruh. Tang ke bendar jangka aku nya ukai ketegal sida enda ulih datai.

Apai nesau semua kaban belayan iya ke jauh enggau ke semak . Iya ke jauh ngena talipaun, bala ke semak disadung enggau kad. Sinu aku meda tudah apai enggau aya Ringkai bejalai besadung ka kad enggau nyendia utai bukai ti patut .

“ Enti sida ari sepiak Jang enda kiruh ke pengawa seduai tu, enda ngawa ga Endu. Nyangka nadai hari mih sida. Kitai enda tau mejal orang ngereja pengawa. ” pia ku apai.

Apai, endang siku orang ti chukup penyabar. Nelap. Enti bejaku ngena chara subuk. Ba pengawa gerija iya endang taluk bendar. Nya mih Ben selalu nundi apai ngela iya paderi. Tuchum apai. Nya kebuah lebuh nyadi kepala pengajar sayau amat bala staf ke iya. Iya puh ngereja utai. Enda sebarang.

Maya makai lemai, bala ari sepiak sida Abel enda mayuh datai mina dua buah kerita nya pan muti sida sebilik aja. Penatai apai indai iya enda dipeda gaga. Sebedau mupuk pagi nya aku meda apai Abel nyuaka kunchi ngagai Abel. Randau seduai enda mega aku ninga enggau silik laban nyau tengelam laban nyawa bala orang ke agi duduk berami. Nya baru aku nemu Abel diberi kunchi sebuah rumah dua tingkat lalu diberi jaku lalau enda ngasuh mai aku pulai ke rumah. Iya mega mesan enda ngasuh diau ba rumah kami. Nama kebuah enda mih aku nemu.

Kira seminggu udah nya kami duai pan lalu pindah ngagai rumah kami duai empu. Rumah corner dua tingkat chat mirah jambu manding bendar dipeda ari luar. Rengka dalam rumah nadai ke nadai . Airkon, peti ais, rengka dapur bisi magang. Kami duai muti pindah mai beg aja. Nadai pemedis ba apai iya meri sebuah rumah ngagai kami duai. Apai Abel kelimpah ari ti bempu GTG Company sebuah kompeni ngaga rumah, serikat nyual motor RZ Enterprise sebuah budget hotel D Farm enggau sebuah pusat ngelantangka ati Rozelo Pub n Lounge. Indai Abel siku ari orang indu kitai bansa ke udah maju dalam pengawa dagang . Kelimpah ari ti bempu sebuah butik iya mega lalu bisi sebuah restoran pemakai. Kelia tusah amat pengidup sida.

Taja pan apai indai iya bakanya Abel endang tetap anak sida iya kelimpah ti udah dianjung belajar di menua tasik dalam pelajar Bachelor in Accountancy enggau Master in Businnes Administration. Abel tu endang diasi apai iya ngambi ulih nulung dalam dagang iya. Dikena meri peneleba ngambika jinak enggau dunya bedagang iya diberi apai megai sebuah kompeni ti nyadung rengka opis baka keretas, pinsil enggau ti bukai ngagai mayuh bengkah sekula enggau opis perintah di menua tu.

Aku agi gawa ba Anna beauty saloon taja pan udah jadi enggau Abel. Pengawa tu dikembuan aku udah ke tembu form 5. Dikena aku ngenalamka agi pelajar dalam bidang ngias diri aku meranika diri empu belatih ba Clara Insitute di kuala Lumpur. Institut tu tebilang bendar alai orang ke ngembuan pengerindu dalam pengawa tu. Kira dua bulan udah kami duai niri ruang bilik, Abel enda ngasuh aku kereja agi laban ku iya duit ti diulih iya chukup di kena kami duai ngidupka diri. Laban ti enggai beserekang penemu enggau Abel dia aku lalu ngetu ari pengawa aku nya taja pan pengawa nya chukup ngerinduka ati. Kelimpah ari ulih betemu enggau mayuh leman orang, mayuh mega peneleba ti diulih ari randau sereta perati orang indu tau ngemajikka gamal diri meri pengeransing ngagai sida ke bempu tubuh. Tang taja pia, penanggul sekumbang ti kereja endang bisi. Enda semua orang puas ati enggau servis ti diberi. Bisi sekali siku indu enda puas ati lalu ngejemika mua ngagai aku. Nyau deka mantul asai anak ati.

“Sabar ajalah Reen. Dalam dunia kecantikan memang banyak cabaran,” ku Fifah, pangan sama kereja lama udah bekelala enggau aku. Iya mih balat meransang aku ngambi latih di Kuala Lumpur taja pan aku jauh ari sida apai indai.

Kira setaun setengah udah kami duai ti begulai melaki bini, perangai Abel nyau jauh bisi berubah ari ke dulu. Iya suah pansut malam nyau lalu enda tentu ibuh ke ruang bilik kami duai agi. Enti pansut malam suah enda nemu maya mulaika diri, nyau deka engkukuk manuk baru ayas iya bisi dipeda ba rumah. Bisi mega dua tiga kali iya enda pulai ke rumah. Aku enggai malu didinga orang selalu belaya lalu diau diri aja. Ku ati aku, dini bisi ruang bilik ke enda kala pansa biau balai. Kenu ku orang, indah batu tungku ga nemu besengki. Maya aku nanyaka penunga iya, iya semina diau diri lalu ngaga diri enda ninga. Aku semampai rungguk-rungguk kediri aja diau ba rumah. Nyau tuyu asai nadai mensia enggau bejaku. Mamau pendiau nadai orang enggau berandau.

.”Nama nanyaka pejalai penunga aku? Enda chukup pemakai perengka rumah? Nama agi utai ke nadai tua?” ku iya mutap pagi nya sebedau nurun ngagai tempat kereja.
“Nuan ga laki aku. Enti nuan orang bukai kapa aku kiruh,” ku timbal aku nyau enda ulih tat ka ati. Tegal ti alah laban pengerindu enggau penyayau ke Abel aku balat nyabar diri ambika ati iya chelap.Tang nyangka nya mih ngasuh perangai iya nyau majak balat agi. Iya selalu ringat. Ketegal penanggul nya aku nyau ngenyemakka diri ngagai jalai Allah Taala. Abel enda mantah aku ninting minggu ngagai gereja minta Allah Taala nyaup aku ngasuh pengidup kami likun. Menya jarang amat kaki tu ngindik utai ti nama gereja anang ke agi besebutka nama Allah Taala.

Lebuh aku benung betubuh bisi Abel enda tentu ibuhka aku. Pemerinsa ditanggung aku kediri. Nasit ga, tegal ari sukung apai indai aku enggau bala bakih ari gerija, aku mujur nujah duri penguji nya. Bala kaban belayan sereta bakih sinu amat meda aku. Mua amat baka ti gaga tang makai belaukka ai mata.

“ Pulai ke rumah sida apai nuan. Ditu merinsa amat aku meda nuan,” ku ibu Chamik. Aku enda nimbal tang semina tak ninga aja.

Chukup bulan maya beranak, aku ngadaka anak indu ti naka pemajik gamal.

“Mua mata iya bekabih bendar enggau jang Abel,” ku indai.
Anak indu nya diberi aku nama Emelia. Maya betal indai mih ngibun aku. Bisi mega sekali dua Abel ngayanka pengerindu iya ngagai anak kami duai. Rengka enggau pekakas anak mit endang chukup, enda pungkang diberi Abel. Tegal ti seruran kiruh enggau anak, enda ga aku kelalu udu berundingka penyinu ati diri. Tang maya umur anak kami duai manggai tiga bulan nya baru aku nemu pengawa Abel ba belakang aku ngelama tu.

Maya nya aku enggau orang gaji ti benama Sopia ari Pontianak deka bebelika rengka anak aku, enda mukai-mukai aku tepedaka ayas Abel pansut ari kerita enggau siku indu bebuk panjai bechuk mirah redam. Umbas amai ga pemajik gamal iya. Silik perening sereta perati aku ngagai mua indu nya, enggaika tak salah sangka ngapa. Tusah enggaika saru orang laban ba nengeri besai mayuh orang sebaka gamal. Endang enda salah peda aku, kerita kami duai Toyota Rush bechura chelum belakang tekura.

Sapa mih indu nya kini ? Petunggal iya kini? Seketari iya kini? Klien iya kini? . Lama aku berunding ke pekara tu. Enda aku arap laki aku ngereja pengawa baka nya. Nyau temati kutu aku . Enda aku sangka penguji datai ngagai pengidup aku balat bakatu.Enda berasai kaki aku tak lalu nyingkang belanda nuju pintu mini supermarket Top Sprint.Tubuh aku penat magang,runding aku majak tusut.Pintu tebuka Aku belanda ukui nuju jalai besai. Aku bediri tegi-tegi,nadai runding agi.Tup..! Kerita Toyota Rav4 ti dipejalaika siku orang ti gawa pasal computer grafik, ngelantak aku. Udah nya aku enda nemu nama penyadi. Sekali aku menchelakka mata peda aku apai .Apai enda tentu bemunyi . Ben enggau bini iya bediri nyendi apai. Harren menyadi biak aku ke belajar ba form tiga sikuk –sikuk nyabak semak katil muak ari kanan aku ti gali.

“ Dini aku tu dih? Nama kebuah kita ngelingi aku? Dini Emi?” tanya aku enggau sabak-sabak.

“ Bisi ba rumah, selamat diibun indai,” pia ku apai. Apai lalu nusui semua pekara enggau silik nama ti nyadi ba aku sehari nya. Apai sambil ti nyerita seruran ngendas ai mata iya.
mmmm
Perening aku nachar ngagai Abel ke bediri ba punggang katil. Pala iya nensam enda bejaku. Mua iya nyau puchat-kelat, nyangka kesal sereta takut. Ati aku balat telih sereta enseriban meda ulah iya ngeyai nya. Dalam ati aku din, nyamai agi mati ari neruska pengidup ti penaggul enggau penguji. Siku pan nadai mih bala kaban entua ngabas aku taja pan sida iya nemu rita aku ti bebadi.

Udah nya sida apai lalu ninggalka aku kediri enggau Abel. Abel nyabak megai jari aku. “Honey, I’m so.. sorry”. Bendar amat iya minta ampun ketegal penyalah diri ti udah balat beduan aku. Aku enda nemu bejaku mayuh agi tang madahka iya pengidup aku udah diserah ngagai petara ti ngatur. Laban endang nadai dua tiga, aku nadai penanggul ngampun semua penyalah ti udah tekelanjur dikereja Abel. “Ngagarapka petara ngampunka penyalah nuan sulu,” ku aku sambil megai jari Abel.


Enti enggau kuasa diri empu endang enda ulih aku nerima Abel pulai baru laban ati aku chukup telih. Nyau pandak cherita kitai udah penusah ti balat nuntung ruang bilik kami duai pengidup kami duai Abel jauh berubah manah ari selama. Abel mega badau agi segau-segau.Iya Abel baka keterubah betemu enggau aku suba .Asaika baru tedani ari mimpi rawan. Maya pengerami ngintu pengada anak kami duai Emilia chukup tiga taun,chukup betuah-belimpah.Tak enda aku sangka bala entua aku bisi sampal datai taja pan ngelama tu sida ngelaungka kami sebilik. Rami amat kami nya. Enda berasai ai mata aku pansut nelusur kuyu lalu labuh beteritik ninggang selepak luak dada enggi aku.Aku nyabak sekali tu ukai ketegal penusah…tang nyabak ketegal ati ti kelalu gaga . Sida entua aku diatu nyau rindu lalu ulih nerima aku nyadi menantu. Aku endang nadai bisi ati dua tiga enggau sida.Entua aku ke indu mega nyau enggai jauh ari uchu iya… Emil.Nya baru aku nemu pemesai kuasa Petara ti nentuka semua pengidup mensia.Terima kasih…Petara .

——————————————————————————————————————–

Jerpan No.3

——————————————————————————————————————–

Randau Ruai
Harry Usup Umbar


Enam taun udah nya, Jawai datai baru ke rumah panjai nya. Beterauh rerenggai kukuk manuk baka ke ngampan penatai iya. Dua tiga iku anak chauk beteridun ngelingi iya, baka ke agi ngelala indu dara bajik nya. Suah iya malik ngagai sebatang andau tebelian ti nyentang nunga batang Sungai Mukah nya. Dia endur iya selalu duduk. Dia sida sepangan serambau suah berandau nyentuk ke silau-silau manuk. Jampat mega mata iya malik ba tengah laman. Sida mega kala bemain asin ba ruang lapang nya. Pengingat begulai enggau bala kaban belayan agi teguh dalam kenang iya datai ke sehari tu.
Mawat diatu nya agi bujang baka dulu suba mega, semampai tuchum-tuchum rerinyik. Iya agi nelap sereta gauk taja pan kami baru betemu sepengudah enam taun enda bepeda. Semina tubuh iya kurus mimit. Buk iya panjai enda diintu sereta disugu. Mawat mai aku ngirup kopi di dapur, nunga ujung bilik. Kami makai buah empasa rebus enggau pisang guring. Maya nya aku melutka mata, tepedaka jalai umai ti repa di belakang rumah panjai. Nadai dipeda agi langkau manuk baka suba. Pia mega, nadai agi batas sayur ti berintai dia. Di menua bukai suah iya meda rumah panjai bukai benung mansang sereta maju, tang rumah panjai ti endur iya ada dulu suba udah nyelai amai. Kada enda bisi penyarut rumah panjai tu? Sayau, enti bala kaban belayan aku ditu nyau bebagi ati, enda segulai sejalai agi. Tu baru diri serumah, semina tiga puluh pintu aja. Enda tentu datai tiga ratus iku bansa Iban diau ba rumah tu suba.
Semina tiga ratus iku aja enda ulih begempung, enda ulih beserakup? Nama kebuah tuai rumah enda tegempungka bala nembiak iya, kini? Kada enda baka nya ga ba endur bukai? Nya baru ba sebuah rumah. Apin agi nyebut ba sebatang sungai. Apin agi bejaku pasal serakup seraban bansa aja. Kada enda tusah agi enti deka begempung diri senengeri, beserakup diri semenua? Makin irau ati Jawai tekenangka pasal penyerakup bansa iya.

Ngingatka cherita lama rumah panjai tu suba, asai ke dalam mimpi iya meda utai ti udah nyadi. Asai ke ngabas tembawai lama iya. Rumah panjai sida dia suba, ukai semina jelai rita tang ngembuan cherita lama ti tebilang kediri empu. Enam taun ti udah ngejang, rumah panjai sida Jawai betampung panjai. Sehari tu iya udah bepapung, putus dua tiga. Ba sekeda endur nyau repa disengkabung babas.
“Nama kebuah?” Jawai nanya Mawat. Ngelama tu bisi ga iya ninga berita angin ti tau ngasuh ati gidan ngerimbas daun pending iya. Tang iya sengaja enggai pechayaka berita ti sebebu ngapa nya. Iya enda puas ati laban enda nemu pun ujung. Maya nya mega iya suah tegepang diempaska gelumbang kemayang ti nyelai sereta charut.
Ketegal pengarap animisme, agama adat aki ini kitai kelia menya? Ketegal adat miring maya Gawai Dayak? Nama kebuah sida ke Kristian muchau laban enggai kena pansa biau manuk atas pala maya ngabang? Nadai kebuah kitai ke udah ngelekaka pengarap lama nya enggai dibatak miring? Kala ga aku meda bala pengari rayat tauka bala menteri ke bepengarap Kristian enggau Islam diasuh bala Iban miring maya sida niki rumah panjai Iban, enda ga sida nya mantah. Nadai nanggul ku sida, laban ukai kitai empu bepengarap ba adat nya. Anggap utai nya nyadi daya idup kitai bansa aja. Iya tau nyadi adat kena bebasaka pengabang enggau temuai.

Iya tau nyadi modal, kena narit ati temuai ke datai ari menua tasik. Rindu amat sida meda daya idup baka nya, laban di menua sida nadai agi utai baka nya. Pama mih, icha ulih nyaup perintah kitai ngemansangka industri temuai. Kada enda tegal tradisyen lama enggau moden betembung lalu dipesi rachun penyarut? Nya endang sigi baka trend daya idup mensia. Tiap-tiap raban mensia mesti muji daya idup diri empu manah, enggi orang jai. Kada enda tegal politik sekeda raban bansa kitai bepechah-belah? Jawai majak nanya diri empu.
“Keterubah, tegal agama,” ku Mawat berengkah muka cherita lama. “Sida ke enggai bai tuai rumah kitai masuk Kristian suba, majak enggai mih, Wai.
Mayuh pengawa ti dikereja kitai ke Kristian mali ku sida. Nya kebuah sekeda ari sida pindah, laban enggai ngelaban penti pemali.”
“Nya mih, ari suba sida nya sigi enda senang ati meda kitai. Sida agi kih bendar deka ngetanka agama adat aki ini kitai kelia. Enda sida nemu adat adat Kristian ulih ngubah pikir bansa kitai? Ba aku enda ga salah enti sida nya agi talukka agama adat aki ini kitai kelia, engka apin maya sida ngelala Allah Taala. Engka Petara kitai empai negu ati sida. Tang anang ga sida mantah daya idup kitai ke baru nya. Aku enda kala bejai sereta mantah agama adat sida nya.”
“Ku tua munyi nya mih. Tang sapa ti sanggup meri sida nya penemu, Wai? Kala aku nguji mantaika penemu ba sida nya, tang baka ti nyiuhka ai ke lubang ga aku.”
“Anang putus pengarap, Wat. Ila tua nguji baru. Kasih ga bala petunggal sereta kaban belayan tua nya. Bisi ga aku kala ninga berita angin, Wat.”
“Tegal pekara bukai?”
“Ukai. Tegal agama mega. Bisi orang ari menua bukai ngerembaika agama Kristian ti nyelai ari adat Kristian kitai. Amat nya, Wat?”
“Amat. Kekadang tau mechahka kitai Kristian ga sida nya, laban sida madah mayuh utai salah ba adat Kristian kitai. Sida madah enda tau sembiang nungkun dian. Sida enda tau kena pesi ai kudus. Gambar Jesus pan enda tau digantung ba dinding, ku sida nya. Tanduk rusa pan enda tau digantung ba didnding baka suba. Kada enda ajar Kristian tesat sida nya, Wai. Irau aku meda bala kitai serumah ke alah kena bai sida tu! Kada sida nya nemu, adat Kristian nya sigi sebengkah ari chara orang ari menua tasik mechahka bansa kitai?”
“Sabar, Wat. Udah sida nemu diri tesat, lama laun sida nya deka enggau kita mega. Nya mih, enti bala kitai deka mai orang nya nitihka kitai, kitai empu mesti mandangka ulah ti manah ngagai sida. Anang belaya enggau sida. Sema sida kala ngangauka nuan sembiang begulai enggau sida, anang enggai datai. Ukai datai mantah chara sida, tang datai begulai sejalai enggau sida nyenbah Alalh Taala mega,” ku timbal Jawai baru, mantaika penemu diri. Makin sinu ati iya.
“Kedua, laban Gawai Antu,” ku Mawat becherita baru. Jawai tegenung laban enda tentu pechaya. Patut tauka enda, pekara Gawai Antu tu ngasuh sebuah rumah panjai pechah belah lalu ngasuh mensia beserara enggau kaban belayani?
Enda ga Gawai Antu tu sebengkah daya idup asal bansa kitai?
“Sekeda bala kitai serumah ke udah megai pengarap Kristian enggai enggau berami. Sekeda terus terang mantah pengerami Gawai Antu nya dirami ba rumah kitai tu, lalu sida deka pindah berumah kediri,” ku Mawat nyambung cherita iya.
“Enti nitihka adat Kristian, sigi enda tau ga sida nirika Gawai Antu, Wat. Tang enda ga sida tau mantah orang ke deka nirika gawai nya. Aku udah seratus peratus nyadi orang Kristian, lalu nadai megai penti pemali agi. Nadai pemali enggau orang berami Gawai Antu,” ku Jawai mantaika penemu diri.
“Ku tua munyi nya mih, wai, tang sida ke pabu penemu ba agama, ukai munyi penemu tua tu,” timbal Mawat baru.
Jawai berasai sinu. Agama patut ulih ngempung bansa kitai, ukai mechah. Tegal agam penyerakup kaban belayan tau lela baka sabun enda ulih meku baru? Sanggup sida ninggalka reta tengkira diri empu, ninggalka rumah panjai lalu berumah nyemuah? Sida ke udah tebuka ati nerima pengarap baru, patut ngembuan pikir ti baru sereta tebuka mega. Nama kebuah sida nya enggai ngerak pikir bala sida ke empai dani? Nadai kebuah sida nya enda ulih nengau arus jalai sida ti agi bejalai dalam petang tegayam. Patut sida nya ulih mechahka tradisyen ti enda releven agi ba pengidup bansa kitai.
Amat tusah bala kitai ba rumah panjai tu nerima ubah pikir diri? Jawai nanya diri empu baru. Kasih iya ngenang bala sida serumah ke agi diau ba baruh tachu baka pama. Asai ke gesak darah iya ninga penerang ari Mawat tadi.
“Kitai serumah diatu, ukai baka suba, Wai,” ku Mawat nampung cherita iya baru, mandangka diri enda senang ati meda Jawai lama tegenung. Jawai nagunka pala sambil meratika mua Mawat.

Pansut ari bilik dapur, seduai bebai pangan diri duduk ba ruai. Nadai dipeda senaya kemayang orang. Amat sengian. Sepengelama seduai berandau, baru bisi dua tiga iku mensia mansutka diri tang sida iya mega kisuk enggau pengawa diri empu. Tujuh pintu ke kiba mega sunyi, baka nya mega bilik ti muak ke kanan, sama sunyi. Ba ruai dua belas pintu endur kami duduk ulih diitung ngena tunjuk orang ke pansut ke ruai. Angin deras ti bepuput di luar rembus tama ke ruai nengah selepak dinding.
“Ketiga, tegal politik. Kitai serumah agi charut pikir pasal politik. Sida ke enda sekula mudah amat dibalut penemu politik ti tepawah, enda niti menasan ti betul. Sida mudah dirachun buah jaku parti pemangkang,” sambung Mawat majak becherita ngagai Jawai.
Jawai mega agi ingat, dulu suba kala apai iya Janting semak deka bibat diri sebilik enggau apai Mawat tegal parti politik. Janting nyukung parti pemangkang, apai Mawat nyukung parti BN. Bebandir rekung Janting mai sida serumah ngundi parti pemangkang. Ku iya pengari rayat sida ti bediri minta pilih ari parti BN, enda ulih mutarka penanggul sida serumah ti agi miskin. Pengari rayat sida ke diatu patut diganti enggau orang ke baru. Pengari rayat sida ukai deka nulung rayat, tang deka munuh rayat, deka ngambi tanah rayat. Ku iya, mayuh orang madah, pengari rayat ari BN enda teaduka penyarut tanah rayat. Apai Mawat, mantah penemu ipar nya nya. Iya enggai limpang ari penemu tuai rumah sida. Jai manah, penemu tuai rumah mih guna. Betul tauka salah arus jalai ti ditebas tuai mih ditengah. Tuai rumah madah, sida serumah enda tau enda ngundi parti BN, laban nya parti perintah ti megai menua Malaysia diatu. Ngundi BN, nya tanda kitai sebansa ulih beserakup enggau pangan diri. Tang nya cherita lama. Jawai nemu, penyarut politik sida serumah ulih diputarka Tuai Rumah Sawing. Kaul iya enggau pengari rayat menua nya seruran terit tanchang. Kelimpah ari injin api, diatu rumah panjai sida udah datai jalai raya. Taja empai ditar, tang ulih ga ditengah sekeda kerita. Suba sida serumah semina bepanggai ba perau enggau injin sepit. Tang diatu, injin sepit semina dikena ngangkut padi aja. Sida serumah enda agi ngena moto ai ngalu ke pasar Selangau. Pengari rayat sida di menua nya majak ngansak bansa kitai ngubah pikir. Daya idup enggau chara pengidup ti lama udah dibalut babas repa anang nguna agi, enti iya nadai mai penguntung. Buai sekeda pengawa enggau adat ti tau ngenataika pengerugi. Enda ibuh disimpan agi pengaruh aki ini kitai kelia. Bansa kitai enda ngayau baka kelia. Mensia beperang ukai nguna duku agi, tang nguna pengelandik teknologi moden. Asai ke agi gegetar pending Jawai ninga jaku lalau ari pengari rayat menua sida nya.
“Pelaba aku agi bisi orang di menua tu empu agi bebendar deka mechahka bansa kitai, Wai.” Mawat nampung cherita iya baru. Jawai ngaru pala sambil nyeling mua petunggal iya nya enda lama.

Iya enda nyangka Mawat kala mikirka utai ti baka nya. Dini iya tu bulih penemu baka nya? Engka ari orang ti bekereja begulai enggau iya, kini? Lama Jawai bepikir. Enda iya nyangka pikir Mawat datai dia.
“Mechah baka ni, Wat?” Agi tekuing ati Jawai ngabas penalam pikir Mawat. Betul tauka enda pikir Mawat datai ba pekara ti suah nyadi buah mulut bansa kitai diatu?
“Ku tuai opis kami, diatu makin mayuh semut dalam pua bansa kitai. Makin mayuh munsang bebulu manuk udah mujur masuk kandang menua kitai. Sida majak nguna taktik Rajah Brooke ti numbangka kuta Libau Rentap ba Bukit Sadok kelia menya. Amat ga, bansa kitai ke dibai Rajah Brooke ngayau ngagai Bukit Sadok kelia semina gaji makai aja, enti bisi. Ku sida, mudah amai meli bansa kitai, seiku semina berega RM20 – RM50 aja. Apuu… parai kitai, Wai. Kumbai sida baka nya memagang tiap-tiap iku kitai. Bansa kitai mudah pechah belah laban parti politik. Peda aku amat, Wai. Nya baka apai tua suba, tegal politik mih seduai kempang ati belaya diri sebilik. Tuai opis kami nya mega kala ngasuh aku madahka kitai serumah tu, anang alah achuk jarum mit bansa bukai. Bansa kitai patut begempung ba sebuah parti politik, baka sida Melayu. Amat penemu nya, Wai?”
“Nya mih utai ti deka dipadahka aku ngagai kitai serumah. Sigi amat nya, Wat. Tang, sapa tua tu? Orang ti kaya raja sereta tinggi pangkat ari tua pan agi ulih mabuk kena tubai duit ringgit. Taja pia, aku tetap sabar, Wat. Ila aku nguji berandau enggau kitai serumah pasal pekara tu. Di menua bukai bansa kitai udah berengkah nemu diri lama udah dikemeli sereta disabung orang belaya enggau pangan diri lalu dipechahka orang. Sida ke udah tesat menasan runding, mayuh udah berengkah mulaika diri ngagai pun jalai baru. Ukai semina ba parti politik aja, tang bansa kitai nyau nemu deka begempung ba serakup SNDU, SIDS, SADIA, SIWA, SPIS enggau ti bukai. Nya mih sebengkah tanda bansa kitai ulih begempung, Wat.”
“Manah mih nya, Wai. Aku arapka utai ti kala dipeda sereta didinga nuan nya nyadi nyata ba rumah panjai kitai tu,” ku Mawat.
Apai Lipai pansut ari bilik lalu ngusung seduai ti duduk jenuh di ruai. Apai Balang duduk betunga enggau Jawai lalu Apai Balang duduk sepiak Mawat. Sida sama-sama enda engkeretik. Sida nangika randau diri didinga orang bukai. Jawai sengaja nyapai kutak segerit Apai Lipai
“Ka nginsap nuan, endu?” tanya Apai Lipai. Jawai ngilikka pala. Iya semina bayam lalu meratika leka jaku enggau ayat ti ditulis ba kutak segerit nya. Maya nya uduk nyalak.
Entah ari babas ni? Pia mega bisi didinga rengung injin sepit mudik ke ulu sungai. Munyi burung ti belalai dalam babas, endang pemerindang ti semampai kekuchau enda ngira siang tauka malam. Kala apai iya Janting madahka iya, sekeda bunyi burung ulih madahka tanda ti jai ngagai mensia ti agi nguan menua nya. Jawai tuchum aja ingatka tangkan apai iya nya. Bunyi burung nadai bisi besangkut paut enggau nasit mensia. Nya sistem komunikasyen sida empu, kitai mensia mega bisi sistem diri empu. Anang ibuhka sistem sida. Jawai enda teguyat ati ninga pekara nya.
Jawai agi beratika ayat jaku English enggau jaku Melayu ti ditulis ba kutak segerit nya. Apai Balang agi meratika mua Jawai, baka ke nganti diri ti deka nuchul insap ba mulut Jawai.
“Berapa bungkus umbas insap nuan sehari, aya,” ku Jawai enda berasai mansutka jaku ba mua Apai Lipai.
“Sebuti umbas dua bungkus, endu.”
Lama Jawai meratika mua Apai Lipai, tang enda ga iya kempang masutka jaku agi. Apai Balang enda tetilap meratika mua Jawai. Mawat agi enda memunyi baka ke benung ngenang utai ti udah nyadi ba sida serumah panjai sida nya. Apai Lipai nyapai sebatang agi segerit lalu nuchul iya.
“Igat, baka ni randau kita pasal ramu sida ke pindah nya, dih?” ku Apai Lipai nanya Mawat. Jawai malik ngagai Mawat, tang Mawat enda merening orang ti nanya iya nya baka ke enda bebasaka tanya Apai Lipai nya.
“Nitihka jaku semua orang mayuh mih, aya. Mesti ditunu ambis lengis,” timbal Mawat baka ke pedis ati.
“Manah mih nya, Wat. Nya sigi patut. Enti lama-lama ramu sida nya enda dibai sida pindah, makin mayuh penusah datai ba rumah kitai tu. Rumah tau nyadi angat-seangat. Sida ke pindah nya pan patut nyua genselan, patut nyua ukum.
Enti enda pia rumah kitai tu tau kena tuntung penusah ngenyit,”saut Apai Balang. Jawai malik ke kiba, malik ke kanan meratika mua seduai ke betimbal jaku nya. Enda ga Jawai kempang nanya Apai Balang, pasal pemali pindah. Iya agi irau ati. Taja udah nyadi orang Kristian, Apai Balang agi ga pechayaka utai mali.
“Keempat, pemarai dua iku kitai serumah ti beturut bulan. Ujung bulan Jun nyin suba anak mit ti baru ada. Bulan Julai tu kemari, Aki Manang,” jampat Mawat ngemanjaika agi jerita lama ti nyadi penyarut lalu mechahka rumah panjai sida. Apai Lipai enggau Apai Balang sama-sama ngagunka pala, tanda nyukung penerang Mawat.
“Rumah kitai makin angat, endu. Nya kebuah kitai serumah baum lalu nirika gawai, minta ampun ngagai Petara. Tang sekeda enda setuju,” ku Apai Lipai.
“Sekeda enggai begawai. Sida deka nguna adat Kristian. Ukai ulih nguna chara nya penti pemali, endun,” ku tambah Apai Lipai.
“Pemarai mensia!!!” Jawai tegepang sereta enda tentu pechaya. Bisi agi ga pekara nyelai ti nyadi pemechah penyerakup mensia. “Kati pemarai mensia tau ngasuh rumah kitai tu suba pechah.
Nadai mensia enda parai. Taun, bulan, hari enggau jam sigi enda sebaka. Kekadang betangkan taun, betangkan bulan, betangkan hari, betangkan jam. Mensia ni ulih nentuka pemarai sida empu. Pemarai mega ukai utai ti dikedeka…”
“Nya amat,endu. Tang enda mih patut nyau beturut bulan. Ulit nyau betinggang-tinggang,” saut Apai Balang. Mawat meratika mua Jawai, baka ke nganti Jawai bejaku baru.
“Ba pikir aku, nya pekara mit. Manah enti deka minta ampun ngagai Petara, engka kitai serumah amat udah mayuh penyalah ti digaga kaki jari, gaga pikir diri,” ku timbal Jawai.
“Tang sekeda kitai serumah enggai begawai sereta miring, endu. Baka ni deka ngintu rumah enti enggai miring?” Apai Lipai nyukung penemu Apai Balang.
“Sida ke udah megai pengarap Kristian, endang patut ga sida enggai begawai ngena piring. Pengawa nya enda diasuh Alllah Taala. Tang sida nya tau ngintu rumah diri ngena adat Kristian mega. Enti bala kitai ke agi megai pengarap lama minta ampun ngagai Petara ngena piring enggau darah babi, orang Kristian minta ampun ngena sembiang, ai kudus enggau kayu regang,” ku timbal Jawai. Apai Lipai enggau Apai Balang beperening pangan diri, tang sengian enda lama meratika mua Jawai.
“Minta ampun ngena ai kudus enggau kayu regang?” tanya Apai Balang reranggap baka orang ke baru dani tinduk.
“Kati enda ngena piring ading enggau darah babi?” tambah Apai Lipai.
“Kapa piring enggau darah babi?” ku Jawai merening mua Apai Lipai enggau Apai Balang ti agi telenga lilih merening mua iya.
“Aki ini kitai kelia madah, piring enggau darah babi nya diserah ngagai antu ke ngachau rumah kitai. Nya mih chara kitai nundukka antu, endu,” ku terang Apai Balang.
“Enti kitai udah megai pengarap Kristian, enda ibuh baka nya, aya. Anang nunduk sereta bepangan enggau antu, aya. Pangan kitai orang Kristian nya Allah Taala enggau Jesus.
Kitai ulih ngintu rumah kitai ngena adat sembiang lalu minta tulung ari Allah Taala,” ku Jawai. Makin berani iya meri peransang pengidup chara moden ngagai Apai Balang enggau Apai Lipai. Seduai sebakih nya majak beperening pangan diri.
“Enti ulih ngintu rumah kitai enda ibuh munuh babi, manah agi ga pelaba aku. Enda kiruh kitai begigaka babi sebelah orang,” ku Apai Lipai.
“Amat mudah agi enti baka nya. Kitai enda mayuh begunaka duit ringgit. Suba ukai main pengiruh kitai serumah tu, enti deka begawai ngintu rumah panjai. Tang…” ku tambah Apai Balang. Iya baka ke agi belala bejaku nusui penelaba diri.
Mawat matak seput lalu ngesuhka angin karbon dioksida nya ngena mulut. Jawai agi besabung perening enggau Apai Lipai seduai Apai Balang. Besai asai pengarap seduai ba Jawai. Apai Balang majak deka becherita tang nyau tebatuk-batuk laban asap sigerit ti salah sirutka iya. Jawai murus belakang Apai Balang, ngichaka iya liat ati agi lalu enda ingatka pekara lama ti udah ngeruga tasik pengidup sida serumah dulu suba.
“Sekeda bala kitai ba rumah panjai tu gila, endu,” ku Apai Balang, tebatuk-batuk baru. Mawat nyapai kutak insap Apai Balang lalu nungkun sebatang. Baru aku meda Mawat nuntum batang segerit. “Gila, gila. Udu amat belaya enggau pangan diri. Jai agi ari apai nuan ti gila nyamah nuan dulu suba.”
“Nuan tentu enda pechaya, endu! Tusah aku mikirka mensia ti ngembuan untak ti landik sekula tang pikir enggau penemu sida pabu amat. Raban tu ngetanka penemu adat, pengaruh sereta reta daya idup sida. Seraban agi, mutus ati muai abis lengis chara lama peturun aki ini tang kekadang mantah chara raban baru ti bukai. Seraban agi nya ngembuan ati tengah hari, tang enggai tentu mantaika serabana diri. Sida tu semampai nyaga ati bala pangan sida. Sida tu orang ti sebaka enggau penemu seduai Mawat,” ku Apai Lipai mantaika serabana diri.
“Tu semina randau kitai empat aja. Lemai tu legi aku nusui semua cherita ngagai nuan. Wai. Pagi ila kitai sama-sama nguji muai semua rumput penanggul ti agi malut rumah panjai kitai ditu,” ku Mawat lalu merening Jawai. Apai Lipai enggau Apai Balang sengian baru. Mawat tetuchum baru.
Jawai semina tuchum lelegup. Meda orang bukai nyau mayuh semayuh pansut ke ruai, sida sama mulaika diri ngagai ruai diri empu. Kenu ku jaku, bisi randau ruai besai deka diatur lemai nya, sebedau sebengkah pengawa berat deka dipejalaika sida tumu pagi ila.


4 thoughts on “Tibang Jerpan (website_PPK)

  1. Bisi mih sepil dalam teks di atas enda nitihka sistem sepil : bala pengajar tau nyeruri iya baru enti nyema deka ngena teks tu dikena ngajar nembiak/peresa

  2. mayuh sepil ti enda nitihka sestem sepil ke baru.. tang manah lalu ulih ngerembaika penemu dalam bidang jerpan tu. terima kasih,

    • Jerpan ti bisi dalam website tu diambi aku terus ari website PPK baka ke dipadah aku ditu. Endang sigi amat munyi ku nuan pengajar. Bala nembiak ulih belajar ngena kereban jerpan tu; lalu dikena dalam pengawa pelajar ari sukut ”’ngedit sepil…nya baru. Terima kasih laban nemuai ngagai website sekula kami.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s